Nog íen dag, en dan hebbe wie gin last mear van die politici die van oe en mie stemmen probeart of te troggelen. Vier joar höar is ze niet. En dan noe, een wekke of dree lang, bent ze niet weg te sloane.

Zollen die politici noe echt denken det het volk doar in trapt?

Nem mien mooie Roalte. De politiek hef het doar meugelijk emaakt det megastallen welkom bent, det ‘r een megastal op stienworp ofstand van de schoele in Mariënheem kump, det geitenholders uit Gederland en Brabant hier vergunning vroagt vöar hun stallen (an de Vlessendiek in Heeten kump de earsten) en det lelietelers vrolijk gif kunt blie’m spuiten.

GB en CDA wringt zich in bochten het doar vöaral niet oaver te he’mm. Woar ze wel prat op goat is de verbouwing van de N35. Mar ok det is ien grote leugen: de weg van Zwolle noar Roalte en Twente noar Mariënheem wördt better. Dus de file kump hier.

Bah, wat is die campagne naargeestig. Hoe kunt volwassen mannegies en vrouwties zo schijnheilig weane.

Vier joar höar ie ze niet. Vier joar mut ie as burger insprekrecht vroang of anders op de tribune oe kop hoalen. Vier joar kieke wie tienenkrommend noar het allerslechtste toneelstuk det d’r bestiet: de roadsvergadering. Vier joar lang kiekt politici noar mekare in plaatsen van noar het belang van de gemeente.

Op 22 meart is het ollemoal of elopen. Dan slöt het stof wear dale. Dan zuukt ze oe en mie niet mear. Dan hebt ze de buit wel of niet binn’.

Op mie noa, ik goa mie niet stille hoalen. As ik de road komme, blief ik oe gewoon lastig vallen, as ’t mut in ‘t Sallands. Want ik wul allenig mar de politiek in öm op de agenda te krieng wat ie belangriek vindt. En dan wul ik ok nog det ie zelf met denkt vöar de mooiste oplossingen.

Want in de samenleving zit völle mear goeje ideeën dan in de roadszaal.
En echte verandering kump van neeje partiejen.

Denne van Knöldert,
Roalte Natuurlijk
Lijst 10

LAAT EEN REACTIE ACHTER

Please enter your comment!
Please enter your name here