“Toen mensen opgeroepen werden onnodige regels te noemen, bleef het verdacht stil”, zei Arie van de Wilt van der PvdA met ien van de debatten op weg noar de verkiezingen. Een gelegenheidsargument det niks zeg oaver onzinregels, mar alles oaver det de oaverheid het niet lukt met zien inwoners in gesprek te weane.

Ik kan oe vertellen, ik ken meansen die de camper in de winterstalling hebt stoane ömdet ze de carpoart niet vief centimeter hoger meung maken.
Ik kan oe vertellen det ik mien veurige huus niet mog bouwen met geel-blonde stienen van Raab Karcher, mar wel met wit-blonde stienen van Van Buuren, terwijl det dezelfde stienen waren.
Ik kan oe vertellen det ik op een biegebouw allenig mar zwarte dakpannen moche lengen, terwijl het vervangen van dakpannen noar een aandere kleur zonder vergunning mag. (en det de gemeente dreigen met een bouwstop, toen ik dus direct mar rooie pannen gebruken.)
Ik kan oe vertellen det ik mien zonnepanelen pas op de grond moch zetten toen ik het een demonstratiedak nuum’, want toen stun’ ze weliswoar nog steeds op de grond, mar was het ok een dak.
Ik kan oe vertellen det ik mien huus niet groter dan 600 kuub (plus tien procent overschreiding) moch bouwen terwijl de gemeente al wus det het een joar later tut 750 kuub moch.
Ik kan oe vertellen det ik een tekening vöar 660 kuub inleaveren, mar det ik d’r iene apart mosse maken vöar die 600 kuub.
Ik kan oe vertellen det ik een vergunning anvreug vöar een biegebouw, det de gemeente die anvroag verkeard vund, mar det ik toch dree moand later een vergunning kreeg.
Ik kan oe vertellen det ie op een bouwtekening altied een paar onzinnige dingen toe mut voegen, die in de onderhandeling dan wear sneuvelt, zodet d’r oaverblif wat ie eigenlijk wult.
Ik kan oe vertellen det in Roalte een ronde woning in het butengebied verboden was toen ik det van plan wasse, mar det ze doar in Dalfsen, vief kilometer wieders, gin probleem met haa’n.
Ik kan oe vertellen det ik verplicht was een meterkastdöare met rooster te he’mm, in verband met eventuele gaslekkage, terwijl ik niet iens gas in mien huus hebbe.
Ik kan oe vertellen det iedere annemmer zo’n meterkastdöare met reuster te leen hef töt noa de controle.

Dus det d’r gin reacties kwamen op de oproep onzinnige regels te melden, bewis niet det d’r gin onzinnige regels bent.

Denne van Knöldert

LAAT EEN REACTIE ACHTER

Please enter your comment!
Please enter your name here