Ie kunt bie de gemeente teengswoardig ok digital een ofspraak maken, zodet ie niet op goed geluk d’r hen goat en dan een lange wachtrieje vöar oe hebt. In disse tied van ‘voor 23.59 uur besteld, morgen in huis’ kan de gemeente niet achter blie’m.

Andere gemeenten brengt oe het paspoart thuus teengswoardig. Die hebt dan niet zo’n onbenullig grote hal mear neudig. En dan kump zo’n ambtenaar ok nog ‘ns een kear onder de meansen.

Oaveral zet ze de techniek in öm ofspraken te stroomlijnen. Hoe mear belang bie de klant, hoe mear d’r doarbie vanuut de klant gedacht wördt.

Bie de verzekering – kwam ik noa vorstschade achter – stuurt ze oe vier daang van te vöaren een mail wukke dag of ze komt en pas een dag van te vöaren, noa 16.00 uur, krieg ie te höaren hoe late. Nou ja, hoe late: vöar of noa de middag…

Ik was van de wekke in het ziekenhuus en doar doet ze het nog wear aans. Met oe ID-kaarte meldt ie oe bie een zuil in de centrale hal. Ie kriegt dan digitaal oe ofspraak te ziene en de plekke woar ie weane mut. D’r stiet een batterieje an vriewilligers kloar öm oe te helpen, want woar die ID-kaarte precies inmut, det is niet zo heel dudelijk.

As ie mear dan twintig minuten te vrog bent, vrög de zuil oe earst in de centrale hal te wachten, anders wördt het op de ofdelingen te druk. En ie kunt oe 06-nummer an de zuil gee’m, zodet hij oe een kwartier vöarof een SMS stuurt det het tied is. De zuil spuugt vervolgens een papiertie uut met woar ie hoe late mut weane, en ie kriegt ok al een indicatie van de uutlooptied.

Denk d’r an det ie det papiertie bewaart, want doar zit een barcode op, die ie mut scannen an de zuil op de ofdeling. Doarnoa löpp iederiene nog eam noar de mevrouw achter balie met de vroage: ‘as ik escand hebbe, hoef ik mie denk ik niet mear te melden?’

Dus det systeem is wel efficiënt!

LAAT EEN REACTIE ACHTER

Please enter your comment!
Please enter your name here