Ik wone op het platteland en doar was de tuindöare wat lange open blie’m stoane. En noe heb ik het huus vol met vlie’ng. Potdomme.

Dus ik het dorp in vöar een vlie’ngmepper. Bie de Albert Heijn hebt dree meissies de hele supermarkt op de kop ‘ezet öm töt de conclusie te kommdet ze gin vlie’ngmeppers verkoopt. Bie de Trekpleister kon ik d’r allenig mar iene op batteriejen of iene met een telescoophengel krie’ng.

Die elektrischen wul ik niet. Wat is det vöar een decadent gedrag.
Die telescoophengel snappen ik niet. Earsten is oe de vliege al lange weg as ie die telescoop wult uuttrekken. Twiddens is zo’n ding natuurlijk met dree kear klappen ‘eknikt.

Een winkel verder mos ik anderhalve euro betalen vöar een mepper die ik zöche.
Wear een winkel verder kreeg ik d’r dreeje vöar det geld. Dus ben ik die iene terugge goan brengen.
Mar wear een winkel verder mos ik 99 cent vöar dree kloppers betalen. (Ie kriegt d’r op een gegeven moment oog vöar.)

Thuus leken de vlieng zich vrolijk vermearderd te he’mm. In een kwartier had ik d’r toch zo 25 noar hun eeuwige jachtvelden ‘ehölpen.

Det is nog een hele kunst trouwens, een vliege meppen. Ze met de haane dood sloane lukt mie inmiddels oarig. As ie in de haane klapt een decimeter boa’m de vlieger, dan is het bienoa altied raak. Mar met zo’n mepper weet ze mie toch nog wel ‘ns kear te ontkommen.

Misschien hebt die goedkoopste meppers een gaattiesstructuur woardöar de luchtverplaatsing toch nie te groot is, woardoar zo’n vliege net op tied het onheil an vuult komm’.

Ien vliege vindt det ollemoal niet zo interessant. Die ging vöar zien tussenpauze steeds op de vliegenmepper zitten. Feitelijk is det wel een heel veilige plekke inderdaad. Mar ja, hij wus nie det ik dree meppers ekochthadde.

 

LAAT EEN REACTIE ACHTER

Please enter your comment!
Please enter your name here